Kon Paunan-o Pagbudo han Akon Amay nga Paragbalsamar

[ with Mayor of Palo (former Leyte Congresswoman), Hon. Remedios "Matin" Petilla, and Leyte Normal University President, Dr. Evelyn Cruzada)

(Haliputay nga Paglaygay)

KON PAUNAN-O PAGBUDO HAN AKON AMAY NGA PARAGBALSAMAR

( ni Jhonil C. Bajado)

Napakiana an kadam-an nga tawo,

Kon paunan-o an pagbudo,

Dara kay hiya man la an paragbalsamar ha am bungto-

An ak amay, nga yana adto na inupod han amon kaapuyan,

An nawara Ambrosio, Leocadio, Rafaela ngan Anastacia.

Una,

lilitason an iya paa,

Ngan pamimilngon an pinaka dako nga ugat.

Hinayon la,

Napaid ako kon patiunan-o kasakit an sinasamaran.

Ikaduha,

kon an pinakadako nga ugat mabilngan na,

Guhu-i ini hin gutiay la,

Sadang la an dagom nga aagi-an han Formalin- masungot.

Bisan waray tahob ha irong, hiara na ako pag ilob,

Sugad kahig-ara han kan tatay mga lapatong ngan latob.

Nagdurot hin pagdumot.

Ikatulo,

Tikangi na pag bumba,

Basi maglakat an medisina,

Abton an iya bug-os nga kalawasan.

Kay han una, panbabayi niya-

Ngan han paglakat niya ha balay,

Waray hiya hiabti ni nanay.

Ikaupat, angay tigamnan,

Gumawas na ngani an medisina,

Tikang ha baba ngan talinga,

Boot sidngon, budo na.

May liwat gutiay nga nagawas ha mata,

Sugad kaguti nga higayon, nga kinita ko nga nagluha hiya han buhi pa.

Ikalima,

Tahion an iya linitas nga paa,

Nagpapahinumdon nga yana, waray na niya chansa,

Chansa nga utro guminhawa,

Urog labi, kay an iya irong, hin gapas sasarupon pa.

Ambot kon may chansa pa, hin pagiparopasaylo.

Tapos,

Sasaluron na an iya lawas,

Liliwnan, panhihimungutan, mimik-apan,

Basi presentable kulawan.

Ngan yana, ipanraraysang na an iya lungon

Ilulungon liwat an mga dumot, pag dire ngan hingangarington.

Anu pa daw la utro adto

An pakiana?

Kon patiunan-o an pagbudo han akon amay?

Aw, madali nga makurihay,

Tahi-on an samad nga durot han hadto nga panahon,

An buduhon, an mag-upay la nga mga dumdom.

____________________________

(Post Scriptum: This poem has been read by the author in the Pasidungog Eduardo Makabenta Sr. Para Han Siday Dinner Celebration, October 13, 2010, Leyte Normal University, Tacloban City, Leyte. Published in "Siyahan nga Hiwat, ed. Voltaire Q. Oyzon, et.al., pp.18-19)