PADAYON! (My Speech in the Pasidungog Eduardo Makabenta Para Han Siday

Padayon!

An usa han akon igin api nga siday in mayda ulohan nga, “Pulong ko pa daw la, kan Kurukutingawngaw”. Hi Kurukutingawngaw an ngaran han pangunahun nga karakter hin usa nga susumaton nga kan nanay iginsusukmat ha amon, han kada gab-i nga madulom (madulom kay an am man la gamit salong/lampara), han mga gab-i, han tiburous pa la ako han akon minayuyo nga bungto, Maydolong, ha Sinirangan Samar. Ha Maydolong ko una kabati an mga laylay, mga laygay, nga say naghitso han porma han akon dila yana.

Pag abot ko han ika tulo nga balitang han elementarya, nakarekawdar kami hin pakapagpakab-it hin kuryente, ngan nakautang hi nanay hin TV. Nawara na an amon “story session” kahuhuman han pangiklop, kay matangka naman kami dayon ha tv, pati hi nanay. Kon diin pagtikang an ngaran nga “pag uswag”, mayda liwat usa nga “linudlod”.

Ha pagtagad han aton mga kasanhi, kadam-an han akon iginhihingaday dida han akon mga siday in may kalabutan han mga kamatuoran han mga naglabay. Mahiunong han mga kaagi, mga panhitabo, mga higayon, nga usahay nawawagtang na, hinin moderno naton nga panahon. Dire gad ngani maraot an pagdukwag, kon dire iginpapasipara an aton pangilal-an.

Dara han tradisyonal nga pag garay han mga siday, nga pinaagi han pag hilwas (oral tradition), siyahan ko pala nakakita o nakabasa hin libro hin tinipon nga mga siday ni Dr. Vic Sugbo han naeskwela pa ako ha kolehiyo. Nasundan ini han usa pa nga libro nga ak nabasa ni Mr. Voltaire Oyzon. Dara nga waray man ako pormal nga edukasyon hin paniday (ha tungod nga Political Science an akon kurso), an pagbasa ko hini nga mga libro in dako nga bulig han akon kontemporaryo nga panlantaw han siday. Ngan yana, naghuhulat pa ako, nga mabasa an mga libro nira Janis Claire Salvacion, Neil lopido, ngan Harold Mercurio.

An Pasidungog Eduardo Makabenta, diri la nagpapakita han manilampuson nga pagtagad han aton Literatura, kundi, ini liwat in nagpapakita nga an mga taga Samar ngan Leyte, nagtitikang na utro hibaro han tinuod nga kantidad han paghigugma han aton pinulungan. Nagpapasalamat ako, hini nga higayon, diin naipapaabot ngan naipapaabat natopn an aton pagpaura han aton Waray-waray.

Maghuhulat ako, nga makausa pa, bisan han antes pa umabot an mga Katsila, nga magrampag utro an aton Waraynon nga Literatura. Diin, makausa pa, tatawagon an aton mga adlaw nga:

Lunes: Tigburukad

Martes: Dumasun

Merkules: Dukutdukot

Hwebes: Baylobaylo

Biernes: Danghus

Sabado: Hinguthingot

Dominggo: Ligidligid

Ngan sugad man han aton kadaan nga pag ihap, An 100 in saka gatus, an 1000- saka yukut, an 10,000- usa ka malara, ngan an 100,00- usa ka maraburaan. Kunta, an Pasidungog Eduardo Makabenta, in magpadayon ngada hin usa kagatos, ug bisan pa saka yukut ka tuig hin pagtalinguha nga magrampag an aton pinulungan han Smar ngan Leyte. Pero siempre, samtang natika iha an Pasidungog Eduardo Makabenta, tikang han WALO (8) ka yukut nga premyo, umabot ngada hin 10,000 o usa la malara, o kon di man, 100, 000- o usa la maraburaan.

Damu nga salamat.

Padayon!

Magrampag, an aton yinaknan.

Maupay nga gab-i ha aton ngatanan!

Padayon!

JHONIL C. BAJADO

(Speech delivered October 13, 2010)